Dear Bro. Atty. Golo,
Nagu-ol ko kay gi priso si Tatay Digs sa ICC. Ang kaso kono “Crime Against Humanity.” Dili man insakto nga “crime against humanity” kay ang gipangpatay mga Adik man. Mga sagbot sa katilingban. Dili sila tawo Angay pamatyon. Mga bootan lay ipabilin, pareha namo. Nag plano lagi me mag “prayer rally,” magkinahanglan pa ba og “permit.”? Kinsa may hangyoon sa “permit” ang Mayor? Ang amo rabang Mayor alalay ni Cong. og ni Gov. nga mga BBM, mga balimbing. Kining problema ni Tatay Digs, mada pa kaha ni og ampo? Mada jud kay wa may imposible sa Guinoo.
LayMinister,
Pater
Dear Bro. Pater,
Kon mag “prayer rally” sulod lang sa simbahan, no need ang permit sa LGU, gawas kon mogamit na og pampubliko nga lugar. (Sec. 6, BP 880). Dili sagbot ang gipangtanay nga wa hatagi’g kahigayonan pagpanalipod pinasubay sa balaod. Tawo sila, adik-adik lang. Ikaw pod, hambogero. Kami, mga masalaypon. Kitang tanan mga makasasala. Apan “love” ta sa Guinoo (Jn. 3:16). Okey kaayo nga mag-ampo kay miingon man gani Siya “pangayo og ikaw hatagan” (Mat. 7:8). Ingna pod si Tatay Digs nga mangayo’g pasyalo kay iya ra ba gitawag ang Guinoo nga “stupido” (BBC, June 26, 2018).
Imong amigo,
Manny G. Golo
Manny G. Golo (EV Mail March 10-16, 2025 issue)
