Dear Atty. Golo,
Sa amo lagi, ang panghatag tagsa ka libo ra. Sa uban lungsod, tag singko mil. Ngano di man pareha? Sa Cebu kono napildi ang ila Governor nga dagko panghatag. Ang nakadaog kono, wa manghatag. Wa diay buot ang taga Cebu kay mobotar man bisan way hatag? Kinahanglan naa jud hatag kay “leader” gud. Ang asawa sa amo mayor, X sa iya kontra nga ako ig-agaw. Gipangutana si Mayor kon pisot ba siya. Ang iya tubag, “pangutan-a ang asawa sa ako kontra.” Daog ang amo Mayor kay ang iya kontra wa man manghatag. Maayo unta sunod dako-dako na hatag ni Mayor. Pila kaha iya gasto?
Matinahuron,
Fausto
Dear Fausto,
Kon 20 mil ka botante ang inyo lungsod, migasto ang inyo Mayor og 20 milyones. Ang inyo Mayor wa manghatag. Namalit siya og boto. Ang politika servisyo, dili negosyo. Kon ang politika himoon nga negosyo, madatu ang politico, ma pobre ang mga tawo. Ang mamalit og boto pwede ma priso hangtod 6 ka tuig (Sec. 261, BP 881). Ang makadaog nga namalit og boto dili “leader” kon dili “DEALER.” Ang namalit og boto, maoy kurakot numero uno. Wa ko kahibawo pilay gasto sa inyo Mayor. Pangutan-a noon ang asawa sa imo agaw nga iya kontra, basin kahibawo siya.
Imo amigo,
Manny G. Golo
Manny G. Golo (EV Mail MAY 12-18, 2025 issue)
