Dear Atty. Golo,
Dili diay si Tagle nahimong Santo Papa? Sayang. Mosikat unta ta. Ako pa to, ma Santo Papa jud ko kay ako man paliton mga Cardinal. Bawe lagi ang gasto kay dako man ang “collection” sa simbahan. Si Dady bitaw nako, way pilde-pilde. Human siya Mayor 9 years, si Momy na pud mipuli. Karon, balik si Dady. Inig kamatay ni Dady, ako na. Mamalit jud aron modaog. Naa lagi nag-ingon nga prisohon ang “vote-buying” di mada uy, mapuno ang prisohan. Ang mga bata na lang ang di ma priso. Kadtong masuko sa “vote-buying” kay wa man moy kwarta, ha..ha..
DaogNaPod,
Pipod
Dear Pipod,
Ang “vote-buying” krimen nga nagtangag og silot hangtod 6 ka tuig pagkapriso (Art. 261, BP 881). Ang katungod sa pagboto, sekreto og sagrado. Ayaw kini pugngi pinaagi sa panghadlok, panghulga o pagpalit. Kinorakot ang kwarta gigamit sa imo Momy og Dady pagpamalit og boto. Kamo ang nagpauna sa Kurapsyon sa governo. Ang kakabus sa mga tawo, imbis inyo tabangan, inyo hinoon gipahimuslan. Way pinalitay ang pagpili sa Santo Papa. Ang mga Cardinal nangayo sa giya sa Espiritu Santo. Di pareha ninyo nga nangayo og tabang sa demonyo, hu..hu..
ImoAmigo,
Manny G. Golo
Manny G. Golo (EV Mail May 5-11, 2025 issue)
