Dear Atty. Golo,
Ang ako anak sa gamay pa, laki. Peru karon, nababaye na. Di na motingog kon tawgon og Kadot kay Candy na kono siya. Gwapa na pod siya. Gusto lagi ni Candy magpakasal siya sa iya uyab nga si Martin. Pwede na tingali kay duna may National Women’s Day gipermahan ni Cory niadto kay babaye man si Cory, tinood? Peru kinahanglan pa kono usbon sa Kongreso, ngano man? Daghan man kono Congressman nga bayot, basin pwede na. Suko raba si Candy sa mga Kongresista kay mga korakot, si VP Sara ila gidaot. Ginganlan ni Candy ang mga Kongresista og buaya, mosogot kaha sila?
Very supportive father,
Roger
Dear Roger,
Niadtong 1990, gipermahan ni Cory ang balaod nga nag observar sa National Women’s Day matag Marso 8 (RA 6949). Sa panahon pod ni Cory, iya gipermahan ang Family Code (EO 209) diin nag-ingon nga ang kaminyoon tali lamang sa babaye og lalaki (Art. 1, ibid.). Dili pwede laki-laki o babaye-babaye. Ang maong balaod valido hangtod karon kay wa man alisdi o amendahi sa Kongreso. Usahay, ang desisyon sa tawo maapektohan sa iyang personal nga pagbati. Posible nga amendahon sa Kongreso ang balaod kay may gahum man sila, labi na kon daghan nang bayot nga buaya.
Imong amigo,
Manny G. Golo
Manny G. Golo (EV Mail March 3-9, 2025 issue)
