MATAG-OB, LEYTE – Dili lang usa ka asunto ang tulobagon karon sa usa ka hubog nga nanumbag ug miembro sa Sangguniang Kabataan (SK) kon dili “multiple changes” pa.
Mahinumdoman nga nadakop sa taga Matag-ob Municipal Police Station, ubos sa liderato ni Police Major Ted Dennis O. Clemencio, ang suspek sa Brgy. Naulayan, ning lungsod niadtong Inero 2. Gi-ila kini nga si alias “Jer,” hingkod ang edad, ulitaw, mag-uuma ug residenti gihapon sa Brgy. Naulayan. Sumala pa naka-dawat ug tawag ang estasyon sa kapolisan kalabot sa insidenti diin ila dayon gi-respondihan aron masuta kini. Ug sa ilang pag-abot naglingkod na ang biktima atubangan sa barangay hall nga may samad ug nag dugo ang tuong bahin sa agtang o kilay. Samtang ang suspek gi-ditinir sa mga barangay official.
Sa inisyal nga imbistigasyon gibutyag nga ni agi lang unta ang biktima sa nahimutangan sa mga suspek nga nag-inum. Gitunolan sya ug ilimnon apan nibalibad sa tagay, butang nga gi-kasuko sa grupo ug kalit nibarog ang suspek dayon walay estorya diritso sumbag sa biktima. Nibunlot pa kini ug hait nga hinagiban ug gihulga pa kini.
Dihang girekisa ang iyang lawas naka-recober ang police gikan sa posisyon sa suspek ug 20 centimeters long nga kutsilyo nga naka suksok sa iyang hawak.
Paglapas sa Batas Pambansa Blg. 6 og Physical Injuries ang ipasaka batok sa suspek. Ni-apelar si Police Major Clemencio sa mga naninda ug ilimnong maka-hubog nga mahimo untang responsable aron malikayan ang ingon niini nga pang hitabo. (Ni Josie Serseña / EV Mail JAN. 6-12, 2025 issue)