BAYBAY CITY – Usa ka di kasarangan nga insidenti ang girespondihan sa Baybay City Police Station, ubos sa liderato ni PLTCOL Nerro M. Hobrero niadtong Marso 25, 2025.
May kalambigitan kini sa gikatahu nga hulga nga dunay bomba didto sa Visayas State University (VSU) sa Brgy. Pangasugan, dakbayan sa Baybay. Dali nga ni-adto sa lugar ang LPPO Explosive Ordnance Disposal (EOD) ug K9 Team. Sa pasi-unang imbistigasyon gibutyag nga gipadangat ang hulga pinaagi sa duha ka email o “anonymous emails” nga gipaagi sa VSU Registrar’s Office. Matud pa dunay gipangayo ang mga suspek nga fifty thousand pesos (PHP50,000.00).
Ang maong email nag kanayon nga, “NAAY BOMBA SA ADMIN BUILDING, UG DILI MO MAGHATAG UG 50,000 PARA AMONG PAGKAON. MO BOTO KINI UNYA MGA ALAS 3 SA HAPON.” Ingon man usab ang mga pulong nga, “OG DILI MO MAGHATAG OG 50,000 PARA SA AMO PAGKAON, MO BOTO ANG BOMBA NGA AMO GI BUTANG SA VSU UNYA ALAS 3.”
Tungod niini dali nga gipabakwit ang mga estudyanti ug empleyado sa nasangpit nga unibersidad samtang nagpahigayon ang autoridad (LPPO EOD team) ug komprehensibong pagpasabot ug pagsubay sa VSU Administration Building gamit ang bomb detection nga K9 unit nga iro. Hinuon pagka alas 4:41 ang takna sa hapon sa maong adlaw, gikompirma ang lugar nga negatibo sa bomba ang lugar ug luwas na. Gibutyag usab sa autoridad nga usa lamang ka insidenti sa pagpangilad ang nahitabo.
Gikuhaan usab ug hulagway ang gipadala nga email aron masumiti ngadto sa Regional Anti-Cybercrime Unit 8 (RACU8) alang sa dugang imbistigasyon. Gi-awhag ni Hobrero ang publiko nga magpabilin nga alerto ug magbinantayon sa palibot ug e-report dayon sa kapolisan kon may mamatikdan nga kahibudngan, para sa dali nga pagsusi ug pagsiguro nga luwas ang komunidad. (Ni Josie Serseña / EV Mail March 24-30, 2025 issue)
