ORMOC CITY – Nadakpan ang usa ka High Value Individual (HVI) sa taga Ormoc City Police Station 5 (OCPS-5), nga nakig koordinasyon sa Philippine Drug Enforcement Agency 8 (PDEA), pinaagi sa buy-bust operation didto sa Brgy. Luna, Ormoc City niadtong Mayo 11, 2025.
Nailhan ang suspek nga si alyas “Aj,” 29 anyos, lalaki, minyo, walay trabaho, ug residenti sa Brgy. Altavista, Ormoc City. Nakompiska sa autoridad gikan sa suspek ang usa (1) ka paketi sa heat-sealed transparent plastic sachet nga dunay sulod nga white crystalline substance o ang gidudahang shabu nga maoy “subject of sale.” Ingon man ang gikan sa posisyon sa suspek nga upat (4) ka paketi sa gidudahang shabu o gitawag nga “subject of possession.” Narekober usab ang usa (1) ka five hundred peso bill (PHP500.00) nga “marked money.”
E-sumiti ang mga nakompiskang ebedinsya partikular ang drugas ngadto sa Ormoc City Forensic Unit para sa chemical analysis. Tanggong na karon ang suspek sa pasilidad sa OCPS-5. Mag-atubang siya sa kaso batok sa RA No. 9165, o ang Comprehensive Dangerous Drug Act of 2002. (Ni Josie Serseña / EV Mail MAY 12-18, 2025 issue)
