ORMOC CITY – Arestado ang target nga mekaniko ug usa ka High Value Individual human nagpahigayon ug operasyon kontra illegal nga drugas ang personnel sa Ormoc City Police Office, ubos sa liderato ni PCOL Nelvin M. Ricohermoso didto sa Purok Ilang-Ilang, Brgy. Punta, Ormoc City niadtong Mayo 26, 2025.
Ang suspitsado mao si alyas “Jun-jun,” 39 anyos, residenti sa Brgy. Doña Feliza Mejia, Ormoc City. Samtang ang grupo nga nakasikop kaniya gilangkuban sa Ormoc City Drug Enforcement Unit (CDEU), Ormoc City Police Station 4 (OCPS-4), Regional Intelligence Unit 8, Leyte Norte Provincial Highway Patrol Group, SOU 8 PNP DEG, PDEA Ormoc City Office/SIU og Ormoc City Intelligence Unit.
Nakuhaan ang suspek sa iyang posisyon ug duha (2) ka heat-sealed transparent plastic sachets nga dunay sulod nga white crystalline substance nga gidudahan kini nga shabu. Ingon man usab ang usa (1) ka dark brown wallet, usa (1) ka coin purse, usa (1) ka Driver’s License, usa (1) ka genuine ug gi-subscribed nga five hundred peso bill (PHP500.00) isip buy-bust money, ug lain pang usa (1) ka five hundred peso bill (PHP500.00) nga bogus money. Hasta na usab ang cash sa lain-laing denominasyon nga ni total sa seventy pesos (PHP70.00).
Ang mga nakompiskang ebedinsya gidala sa Ormoc City Crime Laboratory para sa Chemical Examination. Samtang ang suspek tanggong na sa custodial facility sa OCPS-4, kinsa nag-atubang ug kaso kontra sa RA No. 9165, ang Comprehensive Dangerous Drugs Act of 2002. (Ni Josie Serseña / EV Mail June 2-8, 2025 issue)
