KANANGA, LEYTE – Kapin sa dos milyones ka pesos (PHP 2 million) sa gidudahang illegal nga drogas ang nakompiska gikan sa duha ka High Value Individual (HVI) nga naaresto sa buy-bust operation, gabii sa Pebrero 28 didto sa Upper Poblacion, Brgy. Hiloctogan, lungsod sa Kananga, Leyte.

Gilunsad ang hiniusang elemento sa kapolisan nga gipangulohan sa SOU-8, PNP-DEG ubos kang PLt. Jose Rodel Villaruel. Kauban usab ang Kananga Municipal Police Station pinangunahan nila PCPT. James Mark Ruiz og PLt. Ma. Alma Corpus ug sa 1st LPMFC pinaagi kang PSSg Jame Alvin Caadlawon. 

Ang mga suspitsado giila nga sila si Voltaire Adorza Recta, 36 anyos nga taga Sitio Riverside, og si Ruel Petogo Brase, 42, residenti sa Osmeña Street. Pareho silang molopyo sa Poblacion, lungsod sa Kananga ug pulos niingon nga wala silay trabaho sa pagka karon. Matud sa report sa Kananga Police nga si Brase ang tig supply sa illegal nga drogas sa silingang lungsod. 

Nakuhaan silag mga ebidensya sa ilang posisyon sama sa gagmay og dagkong putos sa gidudahang shabu; ang buy-bust money balor og usa ka libo ka pesos (PHP 1,000) ug ubang gamit sa illegal nga drogas apil na usab ang single motorcycle nga ilang gigamit. 

Gibana bana kini nga motimbang og kapin kon kulang sa 300 grams ug base sa standard drug price niabot sa PHP 2,040,000.

Gidala na sa crime laboratory ang nakompiska nga drogas aron masusi kon positibo kini, samtang tanggong na sa Kananga Police Station sila si Recta og Brase. Gipasakaan na usab silang duha og paglapas sa Sec. 21, Art. II sa RA No. 9165. Ni Josie Sersena (EV Mail Feb. 27-March 5, 2023 issue)