MATAG-OB, LEYTE – Duha ka lalaki nga illegal nga namutol ug kahoy sa kalasangan ang nadakpan sa autoridad didto sa Sitio Kawayan, Brgy. Cansoso ning lungsod sa Matag-ob niadtong Deciembre 14 mga alas 3:30 ang takna sa hapon.
Pinaagi sa taho sa usa ka concerned citizen nga nipasabot ngadto sa Mayor’s Office niaksyon dayon ang kapolisan sa pagpanguna ni PMAJ Arturo Salvacion, Jr. og sa LGU pinaagi sa MENRO ubos kang Charmaine Parac, kauban ang mga forest guards.
Nasakpan sa akto ang pag pamutol nga gigamitan pa og chainsaw. Ang duha ka suspitsado giila nga si Jenito Mulle, 38 anyos, ang helper, ug Geronimo Mulle, 33 anyos nga maoy chainsaw operator. Pulos sila molopyo sa Brgy. Sta. Cruz, Villaba, Leyte.
Nasakmit ang usa ka unit sa chainsaw og mga ginabas nga punuan sa Gemilina nga niabot sa 180.2 ka board feet ug hanagdong nga nisukod tanan sa 312.6 ka board feet. Pasakaan ang duha og kaso pag lapas sa PD 705 ug RA 9175 o ang Chainsaw Act of 2002. Ang maong lakang timaan nga seryoso ang LGU-Matag-ob og PNP sa kampanya kontra illegal logging batok sa pag poo sa kalasangan sa lungsod. Gipasalamatan sa lokal nga kagamhanan ang kooperasyon sa komunidad pinaagi sa pag report sa illegal nga pag pamotol sa kahoy. Nag pahimangno usab si Mayor Bernie Tacoy nga disidido ang iyang administrasyon pag sumpo batok niining mga illegal nga aktibidad og mohimo sa dili maayong binuhatan, apil na ang pag panamas-tamas sa kinaiyahan. Ni Josie Sersena (EV Mail December 19-25, 2022 issue)
