ORMOC CITY – Pahimog-atan ang implementasyon nga mag kontrolar sa pag padagan sa mga sakyanan dinhi sa dakbayan sa Ormoc o ang speed limit nga mandato diha sa Republic Act (RA) 4136, o “An Act to Compile the Laws Relative to Land Transportation and Traffic Rules, to Create a Land Transportation Commission and for Other Purposes.”
Ning simanaha nag miting didto sa City Mayor’s Office si City Prosecutor, Atty. Benjamin Pongos ug City Mayor Lucy Torres Gomez kauban sila si Emmanuel Sevilla, TRO-2, og ang pangulo sa TEAMO nga si Barnsby Cagang. Nitambong usab sila SP Member Gregorio Yrastorza III, SP Member Carmen Jean Rama, SP Member Jasper Lucero, Atty. Joy Romero (City Legal Officer) ug PCol Nelvin Ricohermoso.
Ilang gihisgotan ang hugot nga pag implementar sa nahisgutang balaod nga mag limita sa gikusgon sa pag padagan sa sakyanan sa kadalanan sulod sa RA 4136.
Partikular na sa Chapter IV-Traffic Rules, Article I-Speed Limit and Keeping to the Right. Gihisgotan usab ang implementasyon sa Anti-Drunk Driving diin gamitan na og Breathalyzers ang mga masakpan nga malapason (violators).
Kini nga lakang nalantawan sa pamunoan sa dakbayan og mga ahensya nga makapa benipisyo labi na sa kaluwasan sa mga motorista og pedestrian. Busa giawhag ang mga drayber nga mag amping sa pag maniho og responsabli, aron dili maaksidinti og malikayan nga madakpan. Nag pahigayon usab ang grupo sa Speed Gun Calibration activity kauban ang PNP-HPG ug ang LTO Ormoc District nga “ang speed gun mao ang gadget nga gamiton pag enforce sa overspeeding.” Pag sobra ka kusog ang padagan sa sakyanan nga nilapas na sa speed limit gamitan na niini nga gadget ang driver, pag pasabot pa ni Manny Sevilla. Ni Josie Sersena (EV Mail September 19-25, 2022 issue)
