TABANGO, LEYTE – Padayon ang imbistigasyon sa kapolisan kalabot sa insidenti sa pagpamusil didto sa lungsod sa Tabango sakop sa 3rd District sa Leyte.
Ang Tabango Municipal Police Station (MPS), ubos sa liderato ni Police Captain Anthony Amora, maoy aktibong nag susi niini nga nahitabo niadtong gabii sa Pebrero 9, 2025 didto sa Sitio Tambis 2, Brgy. Poblacion, sa maong lungsod. Gi-ila ang biktima nga si alyas “Gong” nga taga Brgy. Tabing, Tabango, Leyte.
Sumala sa report nga nagsakay sa single motorcycle ang biktima nga nagbyahe sa National Highway dihang kalit syang gipusil sa wa mailhing suspitsado. Naigo kini sa may apapangig ug sa dughan diin wala pa matino ang klase sa armas ang gigamit. Nikaripas pa-ikyas ang suspek paingon sa silingan nga lungsod sa San Isidro, Leyte. Hinungdan nga nakig-koordinasyon ang Tabango MPS sa mga silingan nga lungsod para sa “hot pursuit operation.” Samtang giklaro sa autoridad nga dili opisyal sa barangay ang biktima ug padayon pa karon ang pagtuki sa motibo sa pag-atake sa suspek ngadto sa biktima. (Ni Josie Serseña / EV Mail FEB. 10-16, 2025 issue)
