ALBUERA, LEYTE – Usa ka shooting incident ang girespondihan sa Albuera Municipal Police Station (AMPS) mga 6:40 sa sayong kagabhion niadtong Julyo 6, didto sa Barangay Seguinon ning lungsod.
Ang biktima giila nga si Roland Buyoc y Basa, 56 anyos, minyo og Barangay Kapitan sa Seguinon, Albuera, Leyte. Naigo kini sa iyang ulo og nadala pa sa OSPA-Farmer’s Medical Center sa Ormoc City, diin nakabsan sa iyang kinabuhi.
Wala pa matino ang klase nga kalibre sa gigamit nga armas pagpusil-patay kaniya, gibana-bana nga nahitabo mga alas 6:30 sa gabie.
Base sa Spot Report sa AMPS og sa ilang inisyal nga imbistgasyon, padung na mopauli si Kapitan Buyoc gikan sa iyang baboyan (pig farm) nga nahimotang ra gihapon sa nahisgutang barangay. Samtang gimaniho ang iyang Suzuki multicab, kolor orange nga may plate number JBB 9360, dunay nagsunod kaniya nga “riding-in-tandem” gamit ang single nga motor.
Dihang naabot na sa National Highway og pila nalang ka metros una moliko padung sa iyang pinoy-anan, giposil kini sa suspek nga nag-angkas sa single motorcycle.
Nagpahigayon dayon ang autoridad sa “hot pursuit operation” apan wala masakpi ang mga suspitsado. Ning pagbalita, wala pay gibutyag nga motibo ingon man ang mga suspek sa krimen; sanglit padayon pa ang imbistigasyon sa Albuera Municipal Police Station. Ang Kapitan gihulagway sa mga naka-ila kaniya nga buotan, og matarong nga opisyal sa barangay. Gani buntag sa maong adlaw nasayran nga nitambong pa kini og opisyal nga panagtigum (meeting) didto sa lungsod. (Ni Josie Sersena, EV Mail July 4-10, 2022 Issue)
