ORMOC CITY – Gisugdan na pag trabaho sa Department of Public Works and Highways-Leyte Fourth District Engineering Office (DPWH-Leyte 4th DEO) ang karsada sa Barangay Boroc ning syudad.
Ang construction sa two-lane nga proyekto nag kantidad sa kinatibuk-an og dol-an sa singkwenta milyones ka pesos (PHP 49,499,997.56).
Sumala pa sa DPWH Regional Office 8 nga gipondohan kini ubos sa 2022 General Appropriations Act pinaagi sa Basic Infrastructure Program (GAA/BIP). Ang nasangpit nga proyekto dunay gitas-on nga 2.80 kilometros ug may gilapdon nga singko metros (5 meters), kabag-on nga 0.23 meters.
Kabahin usab sa pag trabaho sa proyekto ang slope protection og culverts ingon man ang 700 meters nga line canal.
Dugang pa sa ahensya og base sa report sa Leyte 4th DEO, nga tumong og tuyo sa maong karsada ang maka benipisyo dili lang ang mga residenti og byahidor, labaw sa tanan ang mga mag uuma sa lugar. Masayon na unya ang transportasyon sa mga produkto partikular ang sa agrikultura paingon sa merkado sa syudad hilabi sa panahon sa ting uwan. Ang Barangay Boroc usa sa mga sudlonon og bukid nga lugar sa syudad sa Ormoc City, apan abunda sa mga produkto sa umahan sama sa mga duma (root crops) nga maoy sagad panginabuhian sa mga lomolopyo. Apan tungod sa kalayo, guba og dili simintado ang dalan komprahon lang og barato ang abot sa mga mag uuma. Dilikado pod sa pag byahi panahon nga dunay emergency. Busa karon pa lang gikalipay na sa katawhan ang konstruksyon sa karsada pinaagi sa DPWH-Leyte 4th DEO. Ni Josie Sersena (EV Mail October 3-9, 2022 issue)
