BAYBAY CITY – Adunay singkwenta (50) ka parisan ang benepesyaryo sa gipasiugdahan sa Baybay City LGU nga Kasalan ng Bayan 2025.
Nahitabo ang malipayong selebrasyon niadtong Hunyo 13, 2025 didto sa Convention Center B, Binaybayon Complex, Diversion Road, Barangay Hibunawan.
Nasayran gikan sa City Information Office nga libre ang pagproseso sa mga dokumento sa ilang kasal, dunay hikay nga saw-an ug pangaon pagka human sa seremonya, may regalo pang tunga sa sako nga bugas.
Sama sa pribadong kasal engrandi usab ang maong okasyon kay ang mga kaslonon mipaso sa hawanan nga grandyoso ang dekorasyon ug matag-usa kanila duna silay token ug pahalipay gikan ni Baybay City Mayor Hon. Jose Carlos L. Cari.
Gawas pa niining gihisgutan, libre usab unya ang “legitimation” sa ilang mga anak didto sa City Civil Registrar’s Office. Mapasalamaton usab ang mga gikasal kay nahimo silang kabahin sa kasaysayan sa Baybay, diin gisaulog niini ang ika-18 ka tuig nga pagka syudad.
Sumala pa sa CIO, nga segun pa ni Philippine Statistics Authority (PSA) pinaagi ni Regional Director Wilma Perante, ang Lokal nga Kagamhanan sa dakbayan sa Baybay lang ang naghimo niini hinungdan nga bulahan ang tanan nga mga Baybayanon nakapahimulos niini. (By Josie Serseña / EV Mail JUNE 9-15, 2025 issue)
