ORMOC CITY – Aron ma serbisyohan pa ang minilyon nga Pilipino, gipalapdan pa sa Philippine Health Insurance Corporation (Philhealth) ang ilang mga programa og mga benipisyo.
Niadtong Octobre 4, gikahinabi sa mga media ang mga tigdumala dinhi sa Ormoc og sa Rehiyon pinaagi sa Media Briefing didto sa Ormoc Local Health Insurance Office, sa pag panguna ni Ronald Jabay, Regional Vice President, ug mga key personnel niini, lakip na ang sa Ormoc sa pag panguna ni Henry Madula.
Gawas sa kalampusan sa mga programa pag respondi sa COVID-19 pandemic, gihatagan og gibug-aton sa Philhealth ang information dissemination kalabot niining serbisyo medikal nga KonSulTa package og uban pang mga benipisyo alang sa mga miembro. Gitawag kini nga libring konsultasyon nga “Sulit at Tama” (KonSulTa) agig suporta sa ahensya para sa universal health programs.
Libring makapa check-up ang miembro sa Philhealth, lakip na ang pagpa laboratory ingon man medicina. Ubos sa Ormoc office (3rd, 4th, 5th Districts), dunay onse (11) na ka partner nga health provider og accredited nga hospital, clinic og mga Rural Health Units.
Sa Ormoc City, gawas sa City Health Department, duna napoy pribadong tambalanan sama sa Clinica Gatchalian og OSPA-FMC ug sa silingang mga lungsod mosunod napod unya human sa mga proceso.
Gitawag usab kini sa Philhealth nga “preventive” programs aron maalagaran ang panglawas sa mga miembro; tungod kay sagad nasabtan sa katawhan nga ang Philhealth nila magamit lang kon maospital. Gi klaro atul sa panag tigum nga walay limit ang konsultasyon. Mahimong mo bisita ang miembro sa Philhealth didto sa ilang opisina o kaha gamit ang Internet pinaagi sa Philhealth Portal.
Damhan usab nga sa mosunod nga mga adlaw, ilang ipaduol sa komunidad ang programa pinaagi sa Barangayan. Nag awhag pod sila sa mga employers nga suportaan ang Philhealth og padayong e rehistro ang mga empleyado og hulogan ang mga kontribusyon. Sa laing bahin, gidasig ang mga empleyado sa pagpa miembro. Ni Josie Sersena (EV Mail October 3-9, 2022 issue)
