KANANGA, LEYTE – Usa ka kalaki nga igo rang nipalit sa tindahan (sari-sari store) ang gipusil sa wapa mailhing mga suspitsado.
Ang insidenti nahitabo didto sa Sitio Urban Poor, Brgy. Poblacion, Kananga, Leyte, mga alas 7:45 sa gabii niadtong April 29, 2025. Dali nga nirespondi ang personnel sa Kananga Municipal Police Station (MPS) ug nasayran nga ang biktima mao si alyas “Marco,” 42 anyos, laborer ug lomolopyo sa nahisgutang dapit. Sa inisyal nga imbistigasyon, duha ka lalaking sakay sa single motorcycle ang kalit nipaboto ug naigo ang biktima sa iyang dughan. Dali ra usab dayon niikyas ang mga suspitsado paingon sa direksyon sa Poblacion proper.
Mismong ang kapolisan ang nagsiguro sa lugar ug nitabang nga madala ang biktima ngadto sa Kananga Municipal Hospital. Nasayran nga gidala ra usab kini sa tambalanan didto sa Tacloban City. Gawas sa hot pursuit operation, gipaladman napod sa Kananga MPS ang imbistigasyon para masabtan ang motibo sa krimen ug madakpan ang mga responsabli niini. Butang nga gipaniguro sa kapolisan sa lungsod nga makab-ot ang hustisya sa biktima ug magpabilin ang kalinaw sa Kananga. (Ni Josie Serseña / EV Mail APRIL 28-MAY 4, 2025 issue)
