ORMOC CITY – Sa record sa kapolisan gibutyag nga love triangle maoy hinungdan nga nadunggaban sulod sa videokehan ang usa ka lalaki nga ni resulta sa hinanali niyang kamatayon.
Ang biktima giila nga si Lemuel Tapalla y Mendoza, 47 anyos, olitaw, taga Brgy. Punta ning dakbayan. Nahitabo ang insidenti sulod sa Room 3, sa M2 Music and Movies sa Brgy. District 5, Real Street, Ormoc City, niadtong Pebrero 2, mga alas 9:00 ang takna sa gabii kapin kon kulang.
Sa inisyal nga imbistigasyon sa niresponding personnel sakop sa Police Station-1 (PS-1), nasayran gikan usab sa nag bantay sa information desk, nga nianang mga alas 8:55 sa gabii may lalaking naka jacket og itom; nangutana kon naa ba sa sulod sa maong establishemento ang iyang asawa dayon rombo sulod sa Room 3.
Matud pa diritso niining gidunggab ang biktima. Dali ra usab nga ni gawas ang suspek og niikyas sa wala masabti nga direksyon ug kon duna bay kauban o gisakyan.
Mga alas 9:12 dihang naabot ang BFP Rescue Unit, apan pag susi sa medical personnel ngadto ni Tapalla wala na kini pulso. Nasuta nga nakaangkon kini og tolo ka samad dinunggaban.
Giproceso sa SOCO ang patayng lawas sa biktima nga nahuman mga alas 12:00 sa tungang gabii (Pebrero 3). May mga ebidensya nga napalgan ang autoridad didto sa nahitabuan apil na ang duguan nga kutsilyo. Padayon ang imbistigasyon sa taga PS-1 apil na ang pag ila sa suspek, og naglaum sila nga mokooperar ang babayi nga giingong maoy sinugdanan sa selos sa suspek; sanglit matud pa dili kadto ang unang higayon nga nagkita o nag abot ang babayi ug ang biktima sulod sa nasangpit nga videoke bar. Ni Josie Sersena (EV Mail Jan. 31-Feb. 5, 2023 issue)
