MATAG-OB, LEYTE – Mismong si Mayor Bernandino “Bernie” G. Tacoy ug ang anak nga si Vice-Mayor Vincent Lynbern Tacoy, kauban ang mga opisyales sa lungsod, ang nanguna pag donate sa dugo pinaagi sa bloodletting didto sa Matag-ob Gym niadtong Septiembre 15.
Duna kini tema nga “Dugo ko, Kinabuhi mo” ug kabahin kini sa mga nagkadaiyang aktibidad ubos sa HIMORASAK Festival sa lungsod sa Matag-ob.
Kapartner sa maong kalihukan ang ONE LGU Matag-ob ug Philippine Red Cross Isabel Chapter, inabagan usab sa Municipal Health Office pinaagi kang Dr. Yvonne S. Ragasa, ug 4th District of Leyte Board Member Ivan C. Centino.
Tuyo sa nasangpit nga aktibidad nga mas masabtan pa sa katawhan ang pagka mahinungdanon sa matag patak sa dugo ug mag dasig pa nga mag donate og dugo. Kay lagi ang donasyon sa dugo usa ka bililhon nga gasa og dalaygon nga buhat sanglit pag luwas kini sa kinabuhi sa nanginahanglan. Gipasalamatan sa Lokal nga Kagamhanan ang mga nipartisipar sa bloodletting activity sanglit importanti ang ilang donasyon alang sa kalampusan sa ilang misyon. Sa gipost sa LGU-Matag-ob FB Page, gitawag ang mga blood donors nga mga bayani pagsalbar sa kinabuhi sa tawo, “The world needs more heroes like you.” Ni Josie Sersene ug hulagway gikan sa ONE LGU Matag-ob FB Page (EV Mail September 12-18, 2022 issue)
