ORMOC CITY – Nagpabilin pa sa kustodiya sa Ormoc City Police Station 6 (OCPS-6) ang lima (5) ka SLI human masikop sa buy-bust operation nga gipasiugdahan sa mga elemento sa SDET OCPS-6, didto sa Sitio Lunas, Brgy. Can-untog, ning syudad gabii sa Hunyo 4, 2025.
Ang lima nga matud pa nalambigit sa pagpamaligya ug illegal nga drugas mao sila si alyas “Senti,” 49 anyos, “Rohing,” 27 anyos, “Felo,” 30 anyos, ug “Leo,” 40 anyos. Puros sila residenti sa Sitio Lunas, Brgy. Can-untog, Ormoc City; ug si alyas “Argie,” 45 anyos, driver ug residenti sa Brgy. Matlang, Isabel, Leyte.
Sa maong operasyon nakuha sa ilang posisyon ang pito (7) ka “heat-sealed transparent plastic sachets” nga may sulod nga “white crystalline substance” nga gidudahang “shabu.” Gibana-bana nga nitimbang kini ug 3.0 gramos. Nakompiska usab ang tibuok PHP500.00 nga buy-bust money, ug laing duha (2) pa ka PHP500.00 bills nga gigamit isip bogus money atul sa transaksyon.
Ang mga nakompiskang ebedinsya gisumiti na sa Regional Forensic Unit 8 para sa qualitative ug quantitative chemical analysis. Samtang ang mga gipaslak sa OCPS-6 ug nagpabilin pa ning pagbalita. Gikasohan na sila tungod sa paglapas sa Section 5, 11 ug 12 Art. II sa RA No. 9165 o ang Comprehensive Dangerous Drugs Act of 2002. Ingon man usab kontra sa RA No. 10640 og RA No. 10591 o Illegal Possession of Firearms kalabot sa Violation of BP Blg. 881 (Omnibus Election Code). (Ni Josie Serseña / EV Mail JUNE 16-22, 2025 issue)
