STA. FE, LEYTE – Mismo ang Provincial Director sa Leyte Provincial Police Office (LPPO) nga si P/Col Dionisio DC Apas, Jr. kauban ang hepe sa Investigation and Detective Management Unit nga si P/Lt.Col Jimmy Boy C. Balasanos ang niadto sa Sta. Fe Municipal Police Station (MPS) aron pangunahan ang imbistigasyon sa napalgan nga patayng lawas.
Sumala sa Sta. Fe MPS, ubos kang P/Lt. Glenn P. Chavero, nga ilang girespondihan niadtong Abril 16, 2025 sa gabii ang impormasyon kalabot sa patay nga nakit-an didto sa usa ka suok nga lugar sa Sitio Can-anao, Brgy. San Miguelay, Sta. Fe, Leyte. Usa ka alyas “Joel” ang personal nga nagpasabot kanila sa estasyon, nga dunay lawas sa usa ka babayi, nag buy-od nga wala nay kinabuhi.
Ang biktima nag sul-ob ug blue mini skirt ug itom nga sleeveless. Daplin ra sa dalan o karsada ang lokasyon diin kini nakita. Gibutyag sa inisyal nga imbistigasyon sa SOCO nga dunay igo sa bala ang lain laing parti sa lawas sa biktima. Duna poy na rekober nga buhing bala sa 9mm nga armas, toy lighter, ug coin purse, pero walay ID nga nakit-an.
Matud pa, may saksi ang nag-report nga may black NMAX nga motor ug sedan nga sakyanan ang naa didto sa lugar sa wala pa ang hitabo. Ang motorsiklo nibalik sa lungsod (town proper), samtang wala na igkita ang kotse pag-usab kon diin na kini nipadung. Gidala ang patayng lawas sa biktima didto sa Municipal Health Office alang sa dugang eksaminasyon. Nagpahigayon pa ang kapolisan sa Sta. Fe ug lawom nga imbistigasyon aron makab-ot sa biktima ang hustisya.
Gimando usab sa Provincial Director nga himuon ang tanang pamaagi (exhaust all efforts) ug kolektahon ang tanang mahinungdanon nga ebidensya para mailhan ang mga suspitsado ug masayran ang motibo sa krimen. “The Leyte PPO remains dedicated to swift justice and upholding peace and order across the province,” pamahayag pa sa maong opisyal. (Ni Josie Serseña / EV Mail APRIL 14-20, 2025 issue)
