MATAG-OB, LEYTE – Naligo sa kaugalingong dugo agi sa samad tinigbasan sa ulo og ubang parti sa lawas ang usa ka mag-uuma dihang naabtan sa kabanay og autoridad.
Ang biktima mao si Sonny Boy Esperas y Rios, 37 anyos, olitaw, mag-uuma ug residenti sa Sitio Purok Curbada, Brgy. Mansalip lungsod sa Matag-ob. Samtang ang suspek giila nga usa ka Wenefredo Diaz y Suralta, 54 anyos, minyo, usa gihapon ka mag-uuma og molopyo usab sa nahisgutan nga dapit.
Nahitabo ang insidenti mga ala una pasado sa kadlawon (1:30 A.M.) sa Mayo 18, didto sa bukirang bahin sa Sitio Purok, Curbada, Brgy. Mansalip, Matag-ob, Leyte.
Base sa report nga nakutlo sa EV Mail sa Matag-ob Municipal Police nga mga alas 6:00 sa buntag dihang personal nga ni taho sa hitabo ang Kapitan sa Barangay Mansalip nga si Hon. Jose Yap. Dala na usab niya niadtong higayona ang responsabli sa krimen kinsa niangkon og nisurender ngadto kaniya. Gi turn-over usab ang hait nga sundang (24 inches including handle) nga gigamit sa suspitsado pag patay sa biktima.
Pinaagi sa superbisyon ni PMAJ Arturo Salvacion, Jr., dali nga gisusi ang lugar aron pag kompirma sa hitabo pinaagi nila PCMS Roger Baronda, ug PCMS Gregg Ramirez. Human sa usa ka oras naabot nila ang nahimotangan sa biktima nga naabtan nilang nagluko og wala nay kinabuhi.
Sa inisyal nga imbistigasyon, nasayran nga nag inom ang suspek ug ang biktima sa pinoy anan ni Virgilio Solvera, ug dihang parihong nanga hubog, naglalis na ang duha. Dayon gamit ang gitakin nga sundang, kalit nga gitigbas ni Wenefredo Diaz si Sonny Boy Esperas.
Bisan samaran na naka dagan pa ang biktima pero nagukdan kini sa suspek, ug didto gitiwasan pa ug panigbas sa lain laing parti sa lawas nga maoy hinungdan nga nakabsan kini sa kinabuhi. Manubag ang suspek sa kasong murder nga ipasaka batok kaniya. Si Constantancio Esperas ang amahan sa biktima maoy mobarog isip reklamanti. Ni Josie Sersena (EV Mail May 15-21, 2023 issue)
