ORMOC CITY – Napalgan nga naglunang sa dugo ug wala nay kinabuhi ang magti-ayon nga parihong senior citizen sulod sa ilang kaugalingong panimalay didto sa Sitio Talong, Brgy. Liloan, Ormoc City, buntag sa Hunyo 18, 2025.
Ang mga biktima mao sila si Thomas Lumbard, 81 anyos, usa ka US citizen, og ang iyang Pilipina nga asawa nga si Sara Lumbard y Sano, 65 anyos, lumad nga taga Ormoc City.
Base sa inisyal nga imbistigasyon sa kapolisan nga naka angkon ang mga biktima ug mga samad dinunggaban (multiple stab wounds) nga hayan matud pa maoy hinungdan sa ilang kamatayon. Namatikdan usab sa autoridad nga nagkatag ang mga kagamitan sulod sa panimalay sa magtiayon busa gitohuan nga dunay pagpanulis nga nahitabo kalabot sa maong nahitabong krimen.
Nagpahigayon usab dayon ang taga Ormoc City Forensic Unit (SOCO) sa ilang “crime scene investigation” ug tabang nga maproceso ang ebidensya. Padayon pa ang imbistigasyon pagtugis sa mga responsabli nga pagtulis ug pagpatay sa magtiayon. Gitahapan nga dili lang usa ka tawo ang suspitsado nga nihimo sa krimen. (Ni Josie Serseña / EV Mail JUNE 16-22, 2025 issue)
