BAYBAY CITY – Niabot sa 200 ka artificial reefs o itloganan sa mga isda ang gibutang sa lawod sakop sa Brgy. San Agustin, syudad sa Baybay diin tua sad nahimutang ang Marine Reservation Area (MRA) sa siyudad.
Sumala pa ni Vice Mayor Ernesto M. Butawan, ang syudad sa Baybay dunay sobra sa “50-kilometer shoreline” sa 26 ka barangays ug 60% sa mga residenti ang nagsalig sa pagpangisda nga maoy paninguhaan ug panginabuhi. Busa usa sa prioridad sa mga programa sa LGU ang coastal resources management.
Sa laing bahin, si Baybay City Mayor Jose Carlos L. Cari, nagkanayon nga ang Artificial Reefs (ARs) maoy nag silbing puy-anan og itloganan (habitat and breeding grounds) sa mga isda ug uban pang marine life sa kadagatan. Ang taga Coastal Resources and Fishery Management Office (CRFMO) usab dunay regular nga monitoring para masuta ang kahimtang sa MRAs.
Dugang pa ni Mayor Cari nga sa Eastern Visayas, ang syudad sa Baybay lang ang may agresibong pag apod-apod ug mga artificial reefs ug para pasilongan ug mag-padaghan sa uban pang produkto sa kadagatan. Sa ingon niini nga paagi abunda na ug dili na mo-adto pag layo nga lawod sakop sa Municipal Waters ang mga mananagat sa Baybay aron lang maka-kuha ug mga dagko og maayong klase sa isda ug kinhason.
Nag kanayon pa si Mayor Boying Cari nga “once the ARs are in place, the seeding of lapu-lapu fry, abalone and sea cucumber will follow.” Nisaad usab siya nga ipadayon ang pag-implementar sa mga programa pag suporta sa panginabuhian sa mga mananagat ug ilang pamilya. (Ni Josie Serseña / EV Mail JAN. 20-26, 2025 issue)