ORMOC CITY – Gisugat ug trahedya ang buwan sa Hunyo alang sa onse (11) ka mga establishemento o sagad mga balay patigayon sakop sa Brgy. South ning syudad (Mabini ug Burgos Street, Real ug Aviles Street) mga alas dose pasado sa kadlawn niadtong Hunyo 2, 2025.
Nadawat ang alarma sa bombero sa syudad mga alas 12:48 sa tungang gabii diiin gipa-ubos sa ika-tulong alarma (3rd Alarm). Ang mga apektado naglakip sa Nicey Burger, TGP Pharmacy, Mercury Hardware, St. Jude Agricultural Supply, Chooks to Go, Uling Roaster ug uban pang building nga na totally ug partially damage.
Sa inisyal nga imbistigasyon ang danyos niabot sa Otso Milyones Pesos (PHP8.4million). Gawas sa mga bombero sa Ormoc nirespondi usab ang mga gikan sa Kananga, Merida, Albuera, Matag-ob ug Baybay City.
Sumala pa nga nakontrolar ang kayo mga alas 2:23 sa kadlawn ug gideklara sa BFP-Ormoc City Fire Station (OCFS) nga fire out pagka alas 3:44 sa kadlawn. Gipasalamat nalang nga walay kinabuhi nga nakalas sa maong sunog. Padayon pa ang imbistigasyon sa OCFS sa hinungdan sa hitabo. (Ni Josie Serseña / EV Mail June 2-8, 2025 issue)
