ALBUERA, LEYTE – Arestado sa Albuera Municipal Police Station, ni Police Major Angelo L. Sibunga, ang mga personalidad kinsa nalambigit sa illegal logging didto sa Brgy. Doña Maria, lungsod sa Albuera, niadtong Inero 7 ning tuiga.
Ang mga suspitsado taga Albuera ra usab kinsa nasakpan dihang nag-ronda ang mga police aron pag-monitor sa mga illegal nga aktibidad sulod sa hurisdiksyon sa maong estasyon. Nakompiska gikan sa posisyon sa mga suspek ang nagka lain-laing sukod nga mga ginabas nga kahoy sama sa Molave og Ipil-ipil. Gi-pasabot gihapon sila sa autoridad kon nganung gidakop sila ug gipasabot sa ilang mga katungod. Dayon gidala sila sa Albuera Municipal Police Station, samtang ang nakompiska nga mga ebedinsya gidala sa opisina sa Municipal Environment and Natural Resources Office (MENRO) sa lungsod para sa igong disposisyon.
Gipasalamatan ni PMaj. Sibunga ang pagpakabana ug suporta sa komunidad pinaagi sa paghatag ug saktong impormasyon. Gidayig usab sa hepe ang kakugi ug didikasyon sa iyang team para sa ilang trabaho pagsumpo sa illegal logging. “This is a collaborative relationship with the community, empowering them to stand together against destructive forces of illegal logging,” sumala pa niya. (Ni Josie Serseña / EV Mail JAN. 6-12, 2025 issue)