ORMOC CITY – Namalik na sa tagsa-tagsa nila ka pwesto ang mga biktima sa sunog sa Brgy. Can-adieng, bisan mag ayom-ayom lang ang struktura sa ilang pinoy-anan sa pagka karon; samtang ang uban kanila temporaryong naka pasilong sa ilang kabanay.
Pangandoy nila nga maka tukod na ug balay hilabi na nag singabot ang Pasko. Base sa nakuha nga kasayoran sa barangay nga 14 ka panimalay og establishimento ang nasunog, 15 ka pamilya ug 40 ka indibidual ang biktima sa maong hitabo. Sumala pa, nadawat sa Ormoc City Fire Station (OCFS) ang alarma mga alas dies pasado sa gabii niadtong Nobiembre 9, 2024 ug dali nga ni respondi sa lugar sa pag pangulo sa ilang Fire Marshall nga si Fire Chief Inspector Darren P. Baclean isip usab Ground Commander.
Sa report sa Bureau of Fire Protection (BFP), napulo (10) dayon ka fire truck ang niabot ug nag tabang aron mapawng ang kayo. Apil sa mga nirespondi ang mga taga Fire Station gikan sa Kananga, Albuera, Matag-ob, Merida, Baybay City, Isabel ug uban pa. Gigamitan nila kini ug “interior and exterior” nga kombinasyon sa pag atake, aron dili na padayon nga mo tabuk ang sunog sa tapad nga mga balay.
Gi diklara ni F/CIns. Baclea-an nga fire out pagka ala una sa kadlawon sa Nobiembre 10, 2024. Gi saka ang insidenti sa Second Alarm Status hinuon “No casualties, only 1 medical emergency were reported,” sigun pa sa OCFS. Hinuon padayon pa ang ilang imbistigasyon, una pa maka deklara sa sinugdanan ug hinungdan sa kayo ingon man ang kinatibuk-ang danyos, nga ibase sa deklarasyon usab sa butang ug balay nga nahanaw sa mga biktima.
Mapasalamaton ang mga bombero sa syudad sa kooperasyon ug koordinasyon sa mga opisyales sa barangay ug syudad kauban ang mga ahensya pinangunahan ni Ormoc City Mayor Lucy Torres Gomez ug Leyte 4th District Representative Richard Gomez, sanglit han-ay ang operasyon hilabi na sa trapiko nga maoy sagad maka balda sa ilang gimbihaton pag respondi matag dunay mahitabo nga sunog. (Ni Josie Serseña / EV Mail November 11-17, 2024 issue)
