ORMOC CITY – “Dili kay ang salapi ra maoy mahinungdanon sa tanan (Money is not everything,” kini ang gipahimug -atan nga unod sa mensahi ni Mayor Lucy Torres-Gomez atul sa proklamasyon niadtong Mayo 13, 2025 sa hapon didto sa Session Hall sa Sangguniang Panlungsod, sulod sa City Hall, dakbayan sa Ormoc.
Emosyonal ang Mayor bisan paman sa maka-bungog nga kadaogan sa tibuok Ormoc Development Team (ODT). Importanti usab kanila ang relasyon ug hugot nga pagtinabangay sa mga dumadapig nga dili basta-basta mahaylo sa pasalig ug paglingla sa kontra. Kini na ang ika-duhang termino ni Mayor Lucy Torres-Gomez diin nidaog usab ang iyang kapikas sa kinabuhi nga si Congressman Richard Gomez sa ika-duhang termino pagka-Kongresista sa 4th District, Lalawigan sa Leyte.
Pulong pa ni Mayor Lucy Torres-Gomez nga usa ka maanindot nga gyera (beautiful war) ang naglabay nga piniliay diin dili kasarangan ang duwa kay grabi ang mga pagsuway nga ilang nasinati. Ug sa kampanya, dunay mosayaw, mokanta, ug magpa-aligri. Apan sa kinatibuk-an gitawag niya nga “magnificent result” kay sa 85 ka Barangay sa Ormoc City, ni resulta kini sa 74 ang 13-0 batok sa ilang mga kaatbang; diin walay natagak kay nilusot ang tanang 10 ka kandidato ubos sa ODT.
Gipasalamatan pa ni Mayor Lucy Torres-Gomez ang mga Ormocanon nga hugot ang pagsalig kanila sa laing termino na usab sa pagserbisyo ug alang sa kalinaw og kalamboan sa dakbayan. Ingon man usab ang mga “prayer warriors” sa pagpangulo sa iyang inahan nga si Julie Torres; labaw sa tanan ang debosyon niya kang St. Joseph kay sama ni Mama Mary nahimo niyang sandiganan sa pagpangaliya nga giyahan hangtod sa tam-is nga kadaogan. (Ni Josie Serseña / EV Mail MAY 12-18, 2025 issue)
