ORMOC CITY – Nagpabilin pang natanggong sa karsel sa Police Station ang driver sa truck nga naka disgrasya niadtong gabii sa Hunyo 1, 2025 sa National Highway sa may Brgy. Cabulihan ning dakbayan sa Ormoc.
Niresulta kini sa hinanali nga kamatayon sa lima ka mga biktima nga naglangkob sa batan-ong mag-partner apil ang ilang usa ka tuig nga anak, sila ang sakay sa single motorcycle nga unang gidasmagan sa truck. Ingon man usab ang magtiayon nga gikan nagsimba, sila ang sakay sa pribadong multicab nga gidaro sa maong truck. Samtang ning pagbalita nagpabilin pa sa tambalanan ang tolo nila ka mga anak tungod sa mga danyus sa lawas nga nasinati.
Ubay-ubay ang kasong gi-atubang sa driver nga si alyas “Anecito,” 48 anyos, taga Brgy. Masarayao, silingan nga lungsod sa Kananga; nga gipasaka sa pamilya sa mga biktima, sama sa reckless imprudence resulting in multiple homicide, multiple physical injuries, ug multiple damage to property. Ang dead-on-the-spot nga 20 anyos nga nag-drive sa motorsiklo didto gihaya sa ilang pinoy-anan sa Brgy. Maticaa, Ormoc City, samtang ang 19 anyos nga iyang ka live-in nga angkas niadtong higayona ug ang bata didto gihaya sa Brgy. Juaton sanglit taga dido man kini.
Sa laing bahin ang magti-ayon nga gikan lang nanimba ug duol na unta moabot sa ilaha sa Brgy. Cagbuhangin ang gihaya ra usab sa ilang pinoy-anan. Sigun sa mga saksi, padung sa syudad sa Ormoc ang truck samtang gikan sa Ormoc proper ang direksyon sa mga biktima; dihang kalit nitabok sa pikas linya sa karsada ang truck ug naharus niini ang motorsiklo ug multicab.
Gawas sa panawagan alang sa panginahanglan sa galastohan sa kabanay pagpalubong sa mga biktima, dakong hagit pa usab sa pamilya ang galastohan sa tolo ka menor de edad nga anak sa magtiayon nga taga Brgy. Cagbuhangin ang gastos sa hospital. Busa padayon silang nanawagan aron makab-ot nila ang hustisya ug mapanubag ang akusado. (Ni Josie Serseña / EV Mail June 2-8, 2025 issue)
