MATAG-OB, LEYTE – Nadakpan na usab ang usa ka suspitsado sa ika duhang higayon human nag-lunsad og buy-bust operation ang mga personnel sa Matag-ob Municipal Police Station, nga gipangulohan ni Police Major Ted Dennis O. Clemencio.
Ang operasyon nahitabo sa highway sa Brgy. Riverside, Matag-ob, Leyte hapon niadtong Pebrero 18, diin ubos usab sa koordinasyon sa Philippine Drug Enforcement Agency (PDEA).
Ang suspek mao si alyas “Dong,” usa ka Street Level Individual (SLI), hingkod ang pangidaron, driver sa Badja ug nag-puyo ra usab sa nahisgutang barangay. Sumala pa nadakpan siya sa susamang salaod niadtong tuig 2016. Nag-positibo ang unang gipalit kaniya pinaagi sa “test buy” hinungdan nga gipalitan siya pag-usab. Nakuhaan siya ug usa ka gamay nga paketi sa gidudahang shabu nga maoy gipalit sa police nga nagpaka-aron ingnun nga “poseur-buyer,” ingon man usab ang usa ka libo ka pesos nga “marked money.”
Dugang nga nakuha pag-rekisa kaniya ang laing tolo ka gagmay nga paketi sa gidudahang illegal nga drugas. Gipa-ilawom siya sa inquest proceeding sa korte diin mag-atubang siyag kasong paglapas sa Sections 5 and 11 of Article II of R.A. No. 9165, as amended by R.A. No. 10640,” ug gi-kustodiya na sa Matag-ob Police Station.
Namahayag ang hepe nga si Police Major Clemencio nga, “Our personnel are committed in working with community members to combat the drug trade and enhance public safety in the municipality of Matag-ob, Leyte.” Gi-saksihan ang operasyon sa Punong Barangay sa maong dapit ug sa media representative. (Ni Josie Serseña / EV Mail FEB. 17-23, 2025 issue)
