MATAG-OB, LEYTE – Maypag nag-uma nalang, kini maoy nakab-ot nga huna-huna sa suspitsado human siya madakpi sa buy-bust operation nga gipahigayon sa Matag-ob Municipal Police Station, sa pagpanguna ni Police Major Ted Dennis O. Clemencio, didto sa highway sa Brgy. Imelda, Matag-ob, Leyte buntag sa Mayo 29, 2025.
Nakig koordinasyon ang estasyon ngadto sa Philippine Drug Enforcement Agency (PDEA).
Ang naaresto mao si alyas “Badong,” 44 anyos, olitaw, nagpuyo ra usab sa maong dapit, kinsa naapil sa mga Street Level Individual (SLI) ug personalidad nga nalambigit sa illegal nga droga sa lungsod sa Matag-ob.
Nakuha gikan sa iyang posisyon ang usa ka paketi sa gidudahang shabu ug ang five hundred pesos (PHP500.00) nga buy-bust money, ug lain pang upat (4) ka paketi sa gidudahang shabu nga gisulod sa putos sa sigarilyo.
Sa resulta sa iyang medikal sumala sa kapolisan nga, nagpositibo kini sa paggamit sa illegal nga drugas, diin giangkon usab niya atubangan sa autoridad ug sa presensya sa EV Mail. Gipa-ilawom dayon siya sa inquest proceeding sa piskaliya ug tanggong na sa Matag-ob MPS ug nag-atubang sa kasong paglapas sa Sections 5 og 11 sa Article II sa R.A. No. 9165.
Sumala pa ni Major Clemencio nga dako ug gikatabang sa kalamposan ang suporta sa komunidad alang sa ilang operasyon, dugang pa niya, “Ang tagumpay ng isang operasyon ay sumasalamin sa lakas ng nagkakaisang komunidad.”
Nagkanayon usab ang suspek nga kon mahatagan siyag laing higayon nga makagawas na siya sa prisohan, mag-ugmad nalang siya sa yuta ug atimanon niya ang kalubian sa bukid. (Ni Josie Serseña / EV Mail May 26-June 1, 2025 issue)
