ORMOC CITY – Arestado ang usa ka lalaki pinaagi sa entrapment operation nga gilunsad sa personnel sa Police Station-1 (PS-1) kauban ang taga OCFMC og BFP, mga alas 4:10 niadtong Deciembre 28, atubangan sa Sound Pro Electronics sa may Bonifacio Street ning syudad.
Ang suspek mao si Emmanuel Villanueva y Cagoyong, 45, minyo, usa ka forklift operator nga taga Purok 6, Brgy. Can-untog, Ormoc City. Ang negosyanting si Wilfredo Renee Llagas, Jr. maoy pribadong reklamante gawas sa mga police og bombero.
Nakadawat ang kapolisan og taho sa modus ni Villanueva nga nag solicit para sa pasko nga nagpaka aron ingnon nga bombero. Ang sobre nga gigamit may naka suwat nga “Fire BFP Merry Christmas and Happy New Year” apan nakompirma nga dili siya koniktado sa ahensya. Dinhi na gikasa ang operasyon pinaagi sa kooperasyon usab sa biktimahonon unta nga maoy nitunol sa five hundred pesos (PHP 500. 00) ngadto sa suspek.
Narekober sa iyang posisyon ang marked money nga tibuok nga kinyentos pesos, mga sobre sa BFP og PNP sa Traffic nga may susamang marka sa solicitation pang pasko. Ingon man ang cash nga nitotal sa four thousand nine hundred pesos (PHP 4, 900.00), duha ka cellphone, ug single nga motor. Gikasohan na sa korte ang suspek ug Estafa og Usurpation of Authority. Sa habig sa BFP nga maoy co-complainant sa kaso nag pasalamat sa negosyanti nga niduol kanila aron e-kompirma ang maong solicitation. Kay kon nihatag pa dayon ang biktima bisan pag nag duda na, posibli dili to ma sumpo ang modus sa suspek og daghan pang mabiktima pinaagi sa peke niyang personalidad. Ni Josie Sersena (EV Mail Dec. 26, 2022-Jan. 1, 2023 issue)
