ORMOC CITY – Duha ka namaligya ug shabu ang nadakpan sa mga miembro sa Ormoc City Police Office (OCPO) sa buy-bust operation didto sa Purok 1, Brgy. Lao, Ormoc City niadtong Hunyo 19, 2025.
Ang mga suspitsado mao sila si alyas “Celo,” 41 anyos nga technician ug nalista isip High Value Individual (HVI) og si alyas “Loloy,” 35 anyos nga mananagat nga nalista sa Street Level Individual (SLI). Pariho silang residenti sa Brgy. Lao, Ormoc City. Ang operasyon gi-organisa sa Ormoc City Drug Enforcement Unit (CDEU) kauban ang Ormoc City Intelligence Unit (CIU) og Ormoc City Police Station 3-Station Drug Enforcement Team (OCPS3-SDET).
Nakompiska gikan sa duha ka suspek ang mga ebedinsya nga lima (5) ka paketi nga may sulod nga “white crystalline” nga gidudahang shabu sa ilang posisyon ug ang usa (1) pa ka paketi nga maoy gipalit sa nagpaka-aron ingnun nga kustomer, ingon man usab ang gi-subscribed sa korte nga PHP500.00 bill isip buy-bust money, ug laing PHP500.00 bill nga bogus money.
Ang mga nakompiskang drugas gidala sa Ormoc City Forensic Unit 8 para sa Laboratory/Chemical Analysis. Samtang ang mga suspitsado naa sa kustodiya sa OCPS3, diin mag-atubang ug kaso kontra sa RA No. 9165, o ang Comprehensive Dangerous Drugs Act of 2002. (Ni Josie Serseña / EV Mail JUNE 16-22, 2025 issue)
