ORMOC CITY – Arestado ang usa ka habal-habal driver human masakpi sa mga police nga imbis mamasada sa motor ni-sideline naman hinuon kinig pamaligya ug illegal nga drugas.
Niadtong Deciembre 14, mga alas dos pasado sa kadlawn, nag pahigayon ug buy-bust operation ang Ormoc City Police Station 3 (OCPS3), pinangulohan ni PLt. Mark Alexis Ruita kauban ang mga sakop sa Philippine Drug Enforcement Agency, didto sa Brgy. Domonar ning dakbayan sa Ormoc. Ang suspek giila nga si alyas “Tonio,” 42 anyos, habal-habal driver nga taga Brgy. Domonar ra gihapon, ug naka lista isip Street Level Individual (SLI).
Nakuhaan siya sa posisyon ug usa (1) ka heat-sealed transparent plastic straw nga may sulod nga white crystalline ug gi-suspetsahan nga shabu, ug duna lain pang napolo (10) ka transparent plastic straw nga may sulod sa gidudahang shabu. Ingon ang usa (1) ka tinuod nga five hundred pesos nga kwarta (PHP500.00) isip buy-bust money.
Ang mga nakompiska nga evidensya labi na ang drugas gidala sa PNP Regional Crime Laboratory Office, sa Camp Sec. Ruperto K. Kangleon sa Palo, Leyte para sa chemical examination. Sa pagdakop sa suspek gipasabot siya base sa Miranda Doctrine alang sa iyang katungod sa pinulongan nga iyang masabtan. Samtang ang suspek gidala sa OCPS3 diin adto siya e-kustodiya. Mag-atubang siyag kaso ubos sa RA No. 9165 o Comprehensive Dangerous Drugs Act of 2002. (Ni Josie Serseña / EV Mail December 16-22, 2024 issue)
