ORMOC CITY – Usa ka sadya nga pang hitabo ang girespondihan sa Bureau of Fire Protection (BFP)-Ormoc City pinaagi sa ilang Emergency Response Team (ERT) buntag niadtong Abril 28, didto sa lapyahan sakop sa Brgy. Naungan ning syudad sa Ormoc.
Malamposon nilang natabangan ang usa ka 24 anyos nga si Dellusa Cabatingan kinsa nakaanak na sa gisakyan niining tabla nga sakayan o bangka.
Sa report sa Ormoc City Fire Station nga usa ka batang lalaki ang gihimogso sa nasangpit nga babayi. Pag abot nila sa baybayon ila dayong gisusi ang kahimtang sa bata og sa inahan sama sa pag monitor sa vital signs. Giputol sa mga medical personnel ang pusod sa puya ug gidala dayon ang pasyenti sa duol nga St. John’s Bluestar Maternity Clinic.
Nasayran nga tabukunon ug tubig ang gipoy-an sa magti-ayon busa kinahanglan pa nilang mag bangka (pumpboat), niadtong higayona padung na unta sila sa klinik aron adto manganak ang ginang. Pero naabtan na sa pagka himugso sa bata. Tungod sa daling pag sanong sa mga bombero, parihong nalapatan sa saktong medikasyon didto sa birthing clinic ang inahan og ang iyang anak.
Alang sa mga emergency, kini ang numero sa Ormoc City Fire Station nga mahimong tawagan 0907-272-6943. Ni Josie Sersena (EV Mail April 29-May 5, 2024 issue)
