KANANGA, LEYTE – Pinaagi sa hiniusang pwersa sa mga operatiba nilampos ang ilang pag aresto sa ika duhang “most wanted person” dinhi sa Rehiyon, kini sumala pa sa Kananga Municipal Police Station, ubos sa hepe nga si PMAJ Romeo Q. Sudario, Jr.
Didto siya nasikop sa Barangay Sabang, Naic, Cavite niadtong Septiembre 23, 2024. Duna kini kasong kalabot sa balaod kontra illegal nga drugas (RA 9165). Nag malamposon ang operasyon sa pakig koordinasyon sa Kananga MPS ngadto usab sa Naic Municipal Police Station.
Ang suspek nga si alyas “Jun-Jun,” 49 anyos, college graduate pero walay klarong trabaho. Natawo kini sa dakbayan sa Ormoc ug didto na nag puyo sa Barangay Sabang, Naic, Cavite. Natuman ang pag dakop kaniya pinasikad sa warrant tungod sa pag lapas sa Sections 5, 11, and 12, Article II of RA 9165 (Comprehensive Dangerous Drugs Act of 2002) ug duna pay probisyon sa RA 10591 (Comprehensive Firearms and Ammunition Regulation Act).
Ang kamanduan gipakanaog sa Regional Trial Court, Branch 12, Ormoc City, Leyte, niadtong Inero 24, ning tuiga. Human basahi sa Miranda Doctrine, gi tanggong na sya karon sa estasyon sa kapolisan sa Naic ug e-byahi dayon aron e-presentar sa korte sa dakbayan sa Ormoc. Ni Josie Serseña (EV Mail September 23-29, 2024 issue)
