ORMOC CITY – Nakoryintihan ang usa ka batang lalaki human mangihi sulod sa gym o covered court sa barangay. Ang biktima mao si Johnder Biacolo y Ongon, otso (8) anyos, taga NHA housing sa Brgy. Margen ning syudad og usa ka Grade 3 pupil.
Sigun sa blotter sa Police Station 3(PS-3) nga mga alas 2:20 sa hapon niadtong Nobiembre 14 dihang nidangop sa ilang estasyon ang ginganlan og Wenil Pajanostan y Biacolo, 33 anyos, aron mag pahibalo nga naay nakoryintihan.
Pag respondi sa kapolisan, nasayran nga mga alas 12:00 sa udto nahitabo ang insidenti. Matud pa nga niadto sa covered court ang biktima kauban ang mga isig ka batang estudyanti, didto nangihi og aksidinti kini nga nakoryintihan sa live wire nga nag bitay sa may C. R., diin ang napanit nga wire nakasab-it usab sa puthaw nga grill.
Gisuwayan pa sa pag tabang ni Kagawad Amador Iña ang bata samtang nag tawag og rescue team.
Gidala dayon si Johnder Pajanostan ngadto sa Ormoc District Hospital pinaagi sa ni respondi nga rescue unit, pero gidiklara nga Dead on Arrival (DOA). Sumala sa PS-3 padayon pang giimbistigahan ang maong kaso, kon kinsay angayan manubag sa kamatayon sa biktima. Ni Josie Sersena (EV Mail November 14-20, 2022 issue)
