BAYBAY CITY – Duna nay “person of interest” ang kapolisan sa usa sa duha ka insidenti sa pagpamosil sa Baybay City niadtong Deciembre 18, 2022.
Sa pag bisita sa EV Mail ning simanaha, nasayran gikan sa Baybay City Police Station nga usa ka Romille Abril y Tabera, 19 anyos, estudyanti og residenti sa Brgy. Guadalupe, Baybay City ang “person of interest” sa pagposil-patay kang Antonio Tabera y Santos, 27 anyos, olitaw, construction worker, taga Zone 15 sa syudad sa Baybay.
Nahitabo kini mga alas 9:40 sa buntag sa may Diversion Road, Brgy. Ga-as, Baybay City. Sa inisyal nga imbistgasyon duha ka wala mailhing lalaki ang gitudlong suspitsado nga mao ang driver sa single nga motor og ang angkas niini.
Sigun sa report, niangkas si Antonio Tabera sa motorsiklo nga gimaniho sa suspek nga duna nay daang sakay nga lalaki. Pag abot sa may iskina sa Diversion Road, nikanaog na ang biktima nga naglingkod sa pinaka luyo.
Apan kalit lang nibunot og armas ang nabilin nga angkas (second backrider), dayon punting sa ulo sa biktima. Niikyas ang mga suspitsado palayo sa lugar gamit gihapon ang nasangpit nga motorsiklo.
Pero may nauna pang shooting incident sa parehong petsa mga alas 12:47 sa may Zone 8, Baybay City diin namatay ang biktima nga si Alexander Granada y Cerilla, 50 anyos, molopyo sa mao gihapong dapit. Lima ka samad pinosilan ang naangkon niini. Wala pa mailhi ang suspitsado sa krimen.
May na rekober ang autoridad sa posisyon sa biktima nga 37 ka plastic transparent sachet sa gidudahang shabu ug cash nga PHP 9,570.00. Padayon pang gipalapdan sa kapolisan ang ilang imbistigasyon sa duha ka kaso nga ni resulta sa kamatayon sa mga biktima. Ni Josie Sersena (EV Mail January 9-15, 2023 issue)
