ORMOC CITY – Walay labot sa election, hinuon personal ang motibo sa nahitabong shooting incident didto sa Sito Tipik 1, Brgy. San Jose, dakbayan sa Ormoc niadtong Marso 9, 2025.
Hinuon gi-kompirma nga walay dautang nahitabo sa reklamante o biktima. Mahinumdoman nga gi-respondihan sa kapolisan ang maong insidenti pinaagi sa gi-lunsad nga “hot pursuit” diin ang suspek gi-ila nga alyas “Nano,” samtang ang reklamante mao si alyas “Alan,” nga usa ka negosyanti ug nagpuyo sa nahisgutang barangay. Gi-kompirma sa taho nga daan ug personal nga dumot ang sinugdanan sa ilang away hangtod nga ni-resulta sa pagpusil sa suspek ngadto sa biktima.
Matud pa, usa ka tawag ang nadawat sa sa Ormoc City Police Station 2 (OCPS2) kalabot sa maong pag-pamusil sa lugar, hinungdan nga nag-pahigayon dayon-dayon sila ug “hot pursuit operations” sa pagpanguna ni Police Captain Rodolfo G. Mercolita sa koordinasyon sa SWAT team sa syudad. Na-ispatan ang suspek didto sa silingan nga Brgy. Labrador.
Apan dihang nakita niya ang nag-singabot nga mga police, nitago sa humayan ang suspitsado. Ug ni-una pa kining nagpa boto ug armas kontra sa kapolisan hinungdan nga nibaws ug pabuto ang mga police aron pag hupa unta sa tensyon.
Sa maong operasyon nakaangkon siya ug daghan samad pinosilan sa lawas. Na-rekober sa nahitaboan ang Kimberly 9mm pistol nga walay serial number, ug duna poy usa ka round sa buhing bala ug magazine nga may duha pa ka dugang live round.
Bisan paman sa dali nga pag kontak ug rescue team apan wala nay kinabuhi ang suspek sa ilang pag-abot. Gi-proceso sa taga Ormoc City Forensic Unit ang crime scene, ug padayon karon ang imbistigasyon alang sa kina tibuk-ang detalyi sa hitabo. (Ni Josie Serseña / EV Mail March 10-16, 2025 issue)
