ORMOC CITY – Ang Lokal nga Kagamhanan sa Omoc ubos kang Mayor Lucy Torres Gomez maoy nag host sa panag tigom niadtong Inero 31 dinhi sa Regional Development Council (RDC) nga siya usab ang RDC Chairperson.

Hinuon sa bulan sa Marso na ang sunod nga (regular quarterly) RDC Meeting. 

Sa maong Special Full Council Meeting, gilatag ang mga mahinungdanong agenda hilabi na ang Regional Development Plan og agig preparasyon sa budget call pinaagi sa Department of Budget Management (DBM). Gi presentar usab ang mga prioridad nga programa og projekto sa matag LGU gikan sa unom (6) ka probinsya ug pito (7) ka syudad lukop Rehiyon Otso. Apil nga nahisgutang agenda ang kalabot sa napulo (10) ka unibersidad og state colleges. 

Sa press conference gibutyag ni Mayor Lucy Torres Gomez nga importanting hatagan og igong konsiderasyon ang climate change sa pag plano og pag implementar sa mga projekto. Sanglit ang lokasyon dinhi sagad maigo sa kalamidad sama sa bagyo ug linog, angay siguraduon nga “resilient to climate change”, dugang pa sa RDC Chairperson Mayor Lucy Torres Gomez.

Hinuon sagad sa gipang endorso nga projekto mga giplanohan ug dali nga maimplementar, ang hagit nalang nga maaprobahan kini hangtod nga masulod sa budget ubos sa General Appropriations Act (GAA). Samtang ang dili mapondohan nga mga projekto mahimong makig tambayayong sa mga pribadong institusyon o kompaniya ug uban pang mga ahensya ma lokal man o langyaw (foreign funding). 

Gitubag pod niini ang kasamtangang kahimtang sa Airport dinhi sa dakbayan sa Ormoc kay andam na ang operasyon niini. Gipaabot nalang ang mga airline companies alang sa mga flights. Ingon man usab ang dugay nang giplano kabahin sa railways dinhi sa Rehiyon nga kanhi sa 1999 pa. Kini og uban pang maingon nga ambisyoso nga mga projekto apan mag dala unya og dugang kalamboan sa Eastern Visayas sa higayon nga mahatagan og katumanan. Ni Josie Sersena (EV Mail Jan. 31-Feb. 5, 2023 issue)