ALBUERA, LEYTE – Padayon pa karon ang imbistigasyon ug gipangita sa autoridad ang mga responsable sa krimen kalabot sa nakit-ang patayng lawas sa usa ka babayi didto sa bakanting lote ug daplin ra sa karsada nga sakop sa barangay Benolho, ning maong lungsod, mga alas 2:15 sa kadlawon niadtong Hulyo 17.
Ang biktima giila nga si Paula Gonzalo, 24 anyos nga taga Brgy. Alegria, Ormoc City. Nasayran gikan sa Albuera Municipal Police Station (AMPS) ubos sa liderato ni PCPT Julio G. Tamayo, Jr., nga dunay samad pinusilan ang lawas niini. Usa ka concerned citizen ang unang ni tawag ug nag pasabot sa estasyon hinungdan nga ilang gisusi ang maong dapit.
Pag abot sa autoridad, ang patayng lawas ginapos ang kamot ug tiil ug gibaatan ug panapton ang baba. Nanawagan karon ang Albuera Municipal Police Station (AMPS) sa publiko aron ma tabangan ang pamilya nga masikop ang mga responsable sa krimen ug makab-ot ang hustisya. “We are committed to finding justice for the victim and her family,” matud pa ni PCPT Tamayo. Kaabag sa imbistigasyon ang mga sakop sa Regional Forensic Unit 8 nga nag proceso ug nangapa ug dugang ebidensya. Nag awhag ang Albuera MPS sa katawhan nga mo kontak sa ilang hotline number 0905-5254417 o email, albueramps@yahoo.com.ph o kaha sa social media accounts: Facebook Account: Albuera Pnp; o Facebook Page: Albuerapnp kon duna silay impormasyon nga maka tabang sa pag sulbad sa kaso. Ni Josie Serseña (EV Mail July 15-21, 2024 issue)
