ORMOC CITY – Human sa napulo (10) ka adlaw nga pakig bisog sa pribadong tambalanan nipanaw na si Kapitan Dennis Laurente sa edad nga 43.
Buntag sa Hunyo 21 dihang gitay-og ang pamilya niini ug ang mga Ormocanon sa kamatayon sa Kapitan. Dili lang ang ginsakopan niini sa Barangay Alta Vista ang nag subo apan ang kinabag-an nga miembro sa Liga ng mga Barangay sa dakbayan sa Ormoc. Mahinumdoman nga buntag niadtong Hunyo 12, iksaktong kasaulogan sa Independence Day dihang gipusil kini samtang sakay sa multicab nga service sa barangay. Padung niadtong higayona ang biktima ug mga kaubang opisyal sa Superdome aron pag tambung sa Araw ng Barangay.
Naigo si Kapitan Laurente sa nagka lain-laing parte sa lawas diin matud pa may bala nga nagpa bilin sa lawas niini (o dapit sa ulo nga bahin). Sa maong hitabo naigo sad sa may paa ang kauban sa sakyanan nga usa ka SK Kagawad, pero luwas ra ang kahimtang niini og wala magdugay sa tambalanan. Pero nag pabilin sa ICU sa hospital ang Kapitan (Punong Barangay) hangtod nga nabugtuan siya sa kinabuhi.
Sa pinaka uwahing estado sa kaso gi hulagway sa autoridad ang termino nga “cleared” apan gi klaro nga dili pa kini ma konsidira nga “solved.” Sanglit gi andam palang nila ang mga dokumento sa pag tino nga ma identify ug hangtod nga mahingpit na ang pag pasakaan ug kaso sa korte ug ma dakop ang duha ka lalaking suspitsado nga nipusil sa biktima, pero wala pay opisyal nga pahayag ang nangulo sa imbistigasyon kalabot sa uban pang detalye sa mga suspek.
Una nang gitahapan ang motibo sa krimen nga may koneksyon sa politika isip usa siya ka Punong Barangay ug illegal nga drogas diin usa siya sa higpit nga nag implementar sa balaod niini; butang nga gipaladman pa sa kapolisan ang ilang imbistigasyon sa kaso. Ni Josie Sersena (EV Mail June 17-23, 2024 issue)
