ORMOC CITY – Tiklo ang usa ka lalaki human giingon nga nisukol sa autoridad ug nakuhaan pa sa ebidensyang kapin sa ten million pesos (PHP 10.2 million) nga balor sa illegal nga drogas.
Si Allan Bulahan, alyas Allan “Tigbas,” taga Brgy. Linao, ang subject sa buy-bust operation pasado ala una sa kadlawon (1:40 A.M.) niadtong Mayo 15, sa Brgy. Tambulilid, ning siyudad.
Ang suspek naka matikod nga police ang iyang ka transaksyon diin nakapalit ang poseur buyer og upat ka paketi sa shabu sa kantidad nga one hundred thousand pesos (PHP 100,000.00), hinungdan nga nag paboto kini sa gihuptan nga armas. Nakabaws ang autoridad og naigo ang suspitsado, nadala pa si Allan sa pampublikong tambalanan apan namatay kini mga alas 2:32 sa kadlawon.
Sumala pa sa report sa Police Regional Office 8 (PRO-8), kini na ang pinaka dakong bolto sa illegal nga drogas base sa accomplishment sa Ormoc City Police Office (OCPO). Diin nakuhaan pa ang suspek sa wala pa matino nga kalibre sa armas.
Nakuha sa nahitaboan ang usa ka pistola ug mga basiyo sa naka buto nga cartridge, 21 ka paketi sa gituhoang shabu, apil ang ziplock bag nga dunay sulod nga drogas og uban pang paraphernalia. Atul sa pag rikisa sa tambalanan, nakuhaan pa og pito ka paketi sa gidudahang drogas.
Matud pa niabot sa 1.5 kilograms sa gidudahang shabu nga nagkantidad sa ten million two hundred thousand pesos (PHP 10,200,000).
Ang operatiba nag langkob sa RPDEU 8, OCPO-CDEU, Police Station-4 (PS4), ug Ormoc City Mobile Force Company (OCMFC). Ni Josie Sersena (EV Mail May 15-21, 2023 issue)
