ORMOC CITY – Balor og kapin sa one hundred thousand pesos (Php 100, 000) ang nadala sa kawatan gikan sa usa ka botika ning syudad.
Usa ka Noriel De Leon, 28 nga sales staff sa Rose Pharmacy sa Real St. corner Aviles St., Ormoc City, ang ni report sa hitabo ngadto sa Police Station-1 (PS-1) diin ang nag complaint mao ang Regional Operations Manager nga si Aida Rojas.
Sigun sa taho, nga dihang mag panso (log-in) na unta sa biometric scanner ang pharmacist nga si Donna Mae Roñosa alang sa iyang pag duty, namatikdan niya nga daw gipugos pag abli ang panudlanan sa kwarta (vault).
Base sa inisyal nga imbistigasyon, ang suspek didto niagi sa 2nd floor sa nasangpit nga building. Gipamutol o giguba ang salog nga kahoy og steel bars gamit ang gabas sa pothaw (steel saw). Dayon gitang-tang ang plywood nga kesami tungod sa stockroom sa pharmacy.
Nilampos ang suspitsado pagsulod sa botika agi sa ground floor diin tua nahimotang ang vault sa kwarta. Gikompirma nga nikabat sa one hundred six thousand pesos (Php 106, 000) ang nadala sa mga kawatan. Wala pa mailhi ang mga suspitsado gani nidangop na sila sa SOCO aron ma proceso ang crime scene, lakip na ang pag ila sa suspek o mga suspitsado. Padayon pa ang follow-up investigation sa kapolisan kalabot sa maong kaso. Ni Josie Sersena (EV Mail August 1-7, 2022 issue)
