NAVAL, BILIRAN – Human makomplito ang unang hugna (First Phase) nga access road paingon sa Subing Subing Hill, Barangay Balacson, sa Municipalidad sa Kawayan ning probinsya, paga-sugdan napod ang PHP20 million nga ika duhang hugna (Phase-2) sa Department of Public Works and Highways (DPWH)-Biliran District Engineering Office (DEO).
Mahinumdoman nga ang projekto sa unang hugna gipundohan sa FY 2024 nga General Appropriations Act (GAA), sa balor nga PHP20 million nga pagkongkreto sa 405-meter two-lane nga karsada. Ang desinyo niini may gibag-on nga 0.23 meters og gilapdon nga 6.10 meters, dunay drainage ug slope protection.
Samtang ang Phase-2, duna gihapon budget nga PHP 20 million ang gidamhan nga paga-sugdan na karong tuiga nga may alokasyon sa FY 2025 GAA. Naglangkub niini ang dugang nga 373-meter two-lane nga karsada diin ang desinyo may gibag-on nga 0.23 meters ug ang gilapdon nga 6.10 meters nga may “embankment, drainage, and slope protection features.”
Kun mahuman na ang dalan, mamenus na unya ang byahi gikan sa base sa Subing Subing Hill ug halos usa ka oras kon magbaktas ngadto sa singko minutos nalang gamit ang sakyanan.
“This project significantly improves access to one of Kawayan’s emerging tourist spots,” nagkanayon si OIC-District Engineer (DE) Irwin L. Antonio. Dugang pa niya “The convenience and accessibility through this road infrastructure will encourage more tourists to visit the place, allowing economic activities to spur in the town.”
Naila ang Subing Subing Hill sa iyang maanindot nga talan-awon labi na sa kina ibabawan nga makita ang bungtod, bukid, bakilid apil na ang dagat ug baybayon sa Brgy. Balacson. Sa pagkakaron usa lang ka lugar (site) ang maadtuan sa mga turista pinaagi sa pagbaktas ug hapit usa ka oras. Kini nga proyekto ubos sa Tourism Road Infrastructure Program (TRIP). (Ni Josie Serseña / EV Mail May 5-11, 2025 issue)
