ORMOC CITY – Kalaboso ang usa ka High Value Individual (HVI) sa gilunsad nga buy-bust operation sa mga operatiba sa Brgy. Linao, Ormoc City, Leyte niadtong Disyembre 14 mga alas 4:45 sa kadlawn.
Gipangunahan kini sa Ormoc City Police Station 4 ubos kang Police Major Angelo L. Sibunga, kauban ang Ormoc Drug Enforcement Unit sa koordinasyon sa Philippine Drug Enforcement Agency 8. Ang suspek giila nga si alyas “Jr.,” 39 anyos, usa ka security guard nga residenti sa Brgy. Tambulilid, syudad sa Ormoc.
Narekober sa suspek ang lima (5) ka pakete sa gidudahang shabu nga may timbang sa 90.42 gramos ug may kantidad nga PHP614,856.00, ingon man ang lehitimo nga 500-peso bill (PHP500.00) nga ginamit isip buy-bust money. Duna poy, pito ka tag 1,000-peso bill (PHP7,000.00) ug laing usa pa ka 500-peso bill (PHP500.00) na bogus money. Labaw sa tanan ang usa ka 9mm caliber pistol nga may serial number 468312, apil ang upat ka bala niini, ug usa ka magazine, may sling bag pa usab.
Ang nakompiska nga mga ebedinsya nga drugas gidala sa PNP Crime Laboratory Office sa Camp Sec. Ruperto K. Kangleon sa Palo, Leyte para sa chemical examination. Mag-atubang ang suspek sa kasong paglapas sa section 5 ug 11 sa RA No. 9165 o Comprehensive Dangerous Drugs Act of 2002 ingon man ang RA 10591 o Comprehensive Firearms and Ammunition Regulation Act. (Ni Josie Serseña / EV Mail December 16-22, 2024 issue)
