ORMOC CITY – Una pa matapos ang tuig 2024 gi-pahigayon pa ang 4th Quarterly Port Management Advisory Council (PMAC) sa nilabay nga bulan, sa pag panguna sa Port Manager nga si Mr. Bernard Calledo.
Panag tagbu kini sa mga tag-iya ug tig dumala sa pribadong pantalan ug mga barko nga nia nag negosyo sa Leyte, Southern Leyte ug Biliran; diin gi hisgutan ang mga kalamposan (accomplishment) sa mga miembro partikular ilawom sa PPA nga naka base sa Ormoc City. Usa sa mga agenda mao ang kalamboan sa Private Ports Registration diin gi-butyag nga dunay walo (8) ka rehistradong mga pribadong pantalan ug usa ang ni-expire na; apan dunay 13 ka unregistered ug usa niini hingpit nang nag-undang.
Suhestyon ni Port Manager Calledo nga subayon ang ilang obligasyon samtang may panahon pang gigahin sa gobierno alang niini; labaw sa tanan pulong niya nga kon mag follow-up o mag-susi sa estado sa mga papeles himuon kining pormal og opisyal pinaagi sa pag-suwat o kaha personal nga mag transaksyon sa opisina sa PPA para ma asistihan sa mga proceso.
Samtang sa laing bahin, base sa report sa Engineering Department sa maong ahensya, nasayran nga target sa kontrata sa nasangpit nga projekto nga mahuman sa Mayo 30, 2025 ang konstruksyon niini. Apan nipahiyom si Port Manager Calledo sa gibutyag nga update sa departamento nga base sa pag-susi niadtong Nobiembre anaa pa palang kini sa “27.5 percent completion.” Hinuon daghang mga rason ang kapasikaran hinungdan nga malangay ang matag projekto, usa na niini ang dautan nga panahon diin walay si bisan kinsay maka kontrolar.
Mahinumdoman nga bale ug duha ka tuig ang lugway sa port expansion project sa Ormoc nga paga buhaton sulod sa 1.4 hektarya nga luna diha sa pantalan. Gidamhan nga kon hingpit na nga matapos ang pantalan mahimong hamugaway na ug maka benipisyo dili lang ang sumasakay sa barko apan ang kinabag-an nga publiko, mga negosyanti nga may kalambigitan ang transaksyon sa pantalan.
Sa pagka karon higpit nga gipatuman sa pier ang “No Entry Policy,” nga buot ipasabot nga dili maka sulod sa pier area kon dili pasahero o kaha walay transaksyon sa pantalan. (Ni Josie Serseña / EV Mail Dec. 30, 2024-Jan. 5, 2025 issue)