ORMOC CITY – Kon basihan ang kataposang Ordinansa niadtong 2019 nga taripa sa plitihan sa tricycle sa syudad, PHP 8.00 pa sulod sa 2.5 kilometros og dugang PHP 1.00 kada mosonod nga kilometro.
Hinuon dunay nag ong-ong karon nga Ordinansa alang sa ominto nga himuong PHP 10.00 ang minimum kada pasahero nga mosakay sa motorcab sakop sa City Proper o sulod sa 2.5 kilometros. Pero wala pa kini ma aprobahi sa Konseho ning Dakbayan.
Niadtong Inero 4 ning tuiga gipahigayon ang Public Hearing alang sa balaodnon nga “An Ordinance establishing the 2022 Fare Rates for motorized tricycles-for-hire in Ormoc City, thereby further amending Ordinance No. 34, as Amended.” Gipangunahan kini ni SP Member Roiland Villasencio, ang Chairperson sa Committee on Transportation ug Committee on Franchises and Public Utilities.
Nitambong usab ang mga miembro sa Sangguniang Panlungsod nga si Hon. Rey Evangelista, Hon. Lalaine Marcos, Hon. Goito Yrastorza og Hon. Bebe Laurente, ang Liga President. Ingon man usab si Dennis Paca, sa Transportation Development Franchising and Regulatory Office; Barnsby Durano Cagang, Head sa TEAM Office o sa City Traffic; ug Atty. Kimberly Cadayona sa City Legal Office. Lakip na ang gikan sa ubang sektor, ang mga driver og operator hasta ang mananakay.
Gipasikaran sa maong hangyo sa mga drivers mao ang pagsaka sa presyo sa gasolina nga nag pamahal usab dili lang sa pyiesa sa motor, apan sa halos tanang pamaliton. Panahon sa pandemya gisabot nalang ang PHP 10.00 minimum nga pamasahi pero limitado sa tolo ang pasahero pag oboserba sa social distancing. Pero wala kini mahimong opisyal nga singil sa motorcab ning syudad diin mao nay naandan karon bisag gibalik na sa kapasidad nga unom ka pasahero.
Si Mr. Paca nipasabot sa mga nitambong kon giunsa pag kab-ot ang kwentada sa mga nagka daiyang rota sa kabarangayan nga lowland og upland areas. Samtang si Councilor Villasencio nagkanayon nga daghan nang lagyo nga barangay ang maayo na og karsada nga kaya nang sudlon og tricycle.
Si Mr. Cagang kinsa niisplikar kabahin sa mga penalties o multa, nagka nayon nga mga lagda kini aron malikayan ang mga Violation. Magsugod ang multa sa PHP 400.00 hangtud PHP 800.00 sama niadtong mobalibad pag pasakay og pasahero, dili mag display sa taripa, bisan ang dili mohatag sa discount sa senior citizen, estudyanti og uban pa. Kadtong mag short pants ra mag drive og dili mag sapatos may multa pod.
Kon dili mosonod sa balaod og ka tolo na ka beses makasala sa parehong Violation o ang gitawag nga “three-strike rule” mas lisod kay apil ang operator sanglit bawian sa frankisa ang nasangpit nga motorcab.
Kini og daghan pang tukion pag aprobar sa Ordinansa og mahan-ay pa, busa sa mosyon ni SP Member Marcos gi “defer” lang una ang Public Hearing og ipadayon lang sa sunod nga pag schedule. Kinahanglan masunod ang insaktong proceso una pa maaprobahan ang usa ka Ordinansa. Karon PHP 10.00 na ang pamasahi og wala nay otso pesos, pero pag sinabtanay nalang kini tali sa pasahero og drivers, pero sa higayon nga dunay reklamo labing kongkreto nga basihan ang opisyal nga taripa nga iplastar sa lugar nga dali makita sa pasahero. Ni Josie Sersena (EV Mail January 2-8, 2023 issue)
