ORMOC CITY – Giluwas sa usa ka Red Cross volunteer ang bata nga nalumos didto sa dagat sakop sa Brgy. Naungan, dakbayan sa Ormoc, niadtong Pasko, pasado alas tres sa hapon.
Ang biktima usa ka 4 anyos nga batang babaye, nga taga Brgy. Don Felipe ning syudad ra usab sa Ormoc. Sigun sa tahu nga dunay kauban nga kabanay ang biktima apan nalipat kini dihang niadto sa dagat aron maligo ang maong bata.
Nahibulong nalang ang amahan nga nag-tapuk na ang mga tawo sa baybayon. Didto na siya nakurat nga iyang anak diay ang gi-tabang. Nigamit sa Cardio Pulmonary Resuscitation (CPR) nga pamaagi ang maong Red Cross-Ormoc Volunteer nga si Ms. Maria Beatrice Ricarte, nga didto usab naligo sa dagat niadtong higayona. Dakong pasalamat sa amahan ngadto sa volunteer tungod kay naluwas ang iyang 4 anyus nga anak. Gidala dayon ang biktima sa hospital aron dugang maatiman. (Ni Josie Serseña / EV Mail December 23-29, 2024 issue)
