MERIDA, LEYTE – Imbis sa arena sa manok, sa sulod nuon sa selda sa Police Station nag-sugat sa bag-ong tuig ang usa ka “Kristo” o referee sa sabungan (cockfighting referee), human kini mag-atubang ug dobling asunto.

Buntag niadtong Deciembre 31 gi-respondihan sa Merida Municipal Police Station, ubos ni Police Major Ronald D. Espina, ang usa ka tahu kalabot sa domestic violence. Ang suspek nailhan nga si alyas “Bogs,” 36, anyos nga taga Upper Highway, Poblacion, Merida, Leyte. Pag-aresto kaniya nasabtan nga dunay gihuptan nga illegal nga drugas sigun usab sa alegasyon sa kalive-in kinsa matud pa iyang gituok, gani naabtan pa sa mga police ang nahitabong komosyon sulod sa ilang panimalay. Gumikan sa insidenti kasuhan siyag paglapas sa R.A. No. 9262 (Anti-Violence Against Women and Their Children Act of 2004).

Ingon man agig resulta pag rekisa kaniya nakuhaan siyag duha (2) ka paketi sa gidudahang shabu ug drug paraphernalia; kasohan usab siya batok sa R.A. No. 9165 (Comprehensive Dangerous Drugs Act of 2002), partikular ang Section 11 ug Section 12.

Matud ni Espina nga mahinungdanon ang dinalian nga pag report kanila bisan sa mga insidenti sulod sa panimalay nga maka hatag ug disturbo o piligro sa komunidad. “This successful police response, originating from a domestic violence report, highlights our commitment to community safety and our dedication to upholding the law. Especially as the year ends and during holidays, we remain vigilant in ensuring a safe community,” dugang pa ni Espina. (Ni Josie Serseña / EV Mail Dec. 30, 2024-Jan. 5, 2025 issue)